ബെംഗളൂരു : ഇംഗ്ലീഷ് പഠിക്കാനും ഇന്ത്യയിലെ ജീവിതം അനുഭവിക്കാനുമായി 2019-ൽ ബംഗളൂരുവിൽ എത്തിയ ഹിരോതോഷി തനക എന്ന ജാപ്പനീസ് വിദ്യാർത്ഥിയുടെ ജീവിതം വഴിമാറിയത് അപ്രതീക്ഷിത സംഭവവികാസങ്ങളിലൂടെയായിരുന്നു. പഠനം പൂർത്തിയാക്കി ജപ്പാനിലെ ഷിസുവോക്കയിലുള്ള മാതാപിതാക്കളുടെ അടുത്തേക്ക് മടങ്ങാൻ പദ്ധതിയിട്ടിരുന്ന തനകയ്ക്ക് പോലിസ് സ്റ്റേഷൻ, ബംഗളൂരു സെൻട്രൽ ജയിൽ, കർണാടക ഹൈക്കോടതി, സംസ്ഥാന മനുഷ്യാവകാശ കമ്മീഷൻ, തടങ്കൽ പാളയം എന്നിവയിലൂടെ കടന്നുപോകേണ്ടി വന്നു. ഒടുവിൽ 2021 ഏപ്രിലിലാണ് ഇയാളെ ജപ്പാനിലേക്ക് നാടുകടത്തിയത്.
ബംഗളൂരുവിൽ എത്തിയതിന് ഏകദേശം ഏഴ് വർഷങ്ങൾക്ക് ശേഷം, കർണാടക സർക്കാരിൽ നിന്ന് 75,000 രൂപ നഷ്ടപരിഹാരം നേടിയിരിക്കുകയാണ് 36-കാരനായ തനക. 19 ദിവസം തനകയെ അനാവശ്യമായി ജുഡീഷ്യൽ കസ്റ്റഡിയിൽ പാർപ്പിച്ചതായി കണ്ടെത്തിയതിനെ തുടർന്നാണ് കർണാടക സംസ്ഥാന മനുഷ്യാവകാശ കമ്മീഷൻ നഷ്ടപരിഹാരം നൽകാൻ ഉത്തരവിട്ടത്.
എന്നാൽ ഈ നിയമപോരാട്ടത്തിനിടയിൽ 2021 ഫെബ്രുവരി 28-ന് പുലർച്ചെ നടന്ന ഒരു സംഭവമാണ് ഏറെ ശ്രദ്ധേയം. ആർ.ടി നഗറിലെ ജെ.സി നഗർ അസിസ്റ്റന്റ് കമ്മീഷണർ ഓഫ് പോലീസിന്റെ ഓഫീസിലേക്ക് നടന്നു കയറിയ തനക, അവിടെയുണ്ടായിരുന്ന ഒരു വെള്ള പ്ലാസ്റ്റിക് കസേരയെടുത്ത് സെൽഫിയെടുത്ത ശേഷം അത് ബി.ടി.എം ലേഔട്ടിലുള്ള തന്റെ മുറിയിലേക്ക് കൊണ്ടുപോയി. കസേര മോഷ്ടിക്കുക എന്നതായിരുന്നില്ല ഇയാളുടെ ലക്ഷ്യം, മറിച്ച് പോലീസ് തന്നെ അറസ്റ്റ് ചെയ്യണം എന്നതായിരുന്നു.
തനിക്കെതിരെയുള്ള മനുഷ്യാവകാശ പരാതികളിൽ പോരാടുന്നതിനായി ഇന്ത്യയിൽ തുടരാൻ അറസ്റ്റ് ചെയ്യപ്പെടുന്നതാണ് നല്ലതെന്ന് തനക വിശ്വസിച്ചു. ആ സമയത്ത് സാമ്പത്തിക ബുദ്ധിമുട്ടുകൾ അനുഭവിച്ചിരുന്ന ഇയാളുടെ വിസ കാലാവധി അനിശ്ചിതത്വത്തിലാവുകയും രാജ്യം വിടാൻ അധികൃതർ ഉത്തരവിടുകയും ചെയ്തിരുന്നു. തനിക്കെതിരെ പോലീസിന്റെ ശ്രദ്ധ തിരിച്ചറിയാനായി നടത്തിയ ഒരു അടിയന്തിര ശ്രമമായിരുന്നു ആ സംഭവമെന്ന് തനക പിന്നീട് വ്യക്തമാക്കി.
2019-ൽ ഒരു സ്വകാര്യ ഇംഗ്ലീഷ് അക്കാദമിയിൽ ചേർന്നതോടെയാണ് പ്രശ്നങ്ങളുടെ തുടക്കം. ഇവിടെ ക്ലാസുകൾ നിരന്തരം റദ്ദാക്കുകയും ക്രമരഹിതമായി നടക്കുകയും ചെയ്തതിൽ തനക അസംതൃപ്തനായിരുന്നു. അക്കാദമി മേധാവിയോട് കാര്യങ്ങൾ തിരക്കിയെങ്കിലും മറുപടി ലഭിച്ചില്ല. ഇത് പിന്നീട് ഇരുവരും തമ്മിലുള്ള തർക്കത്തിലേക്ക് നയിക്കുകയും, പ്രകോപിതനായ തനക അക്കാദമി മേധാവിയെ മർദ്ദിക്കുകയുമായിരുന്നു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
